Kryetari i PD, Lulzim Basha ka akuzuar ministrinë e Shëndetësisë se fsheh shifrat e të vdekurve dhe të të infektuarve me koronavirus në Shqipëri. Gjatë një bashkëbisedimi me gazetarët, kryedemokrati u shpreh se ka më shumë të vdekur sesa raportohet dhe sistemi shëndetësor po shkon drejt kolapsit. Basha ka denoncuar ditën e sotme se një numër i lartë mjekësh janë infektuar në spitalin e Matit dhe se disa pavionë janë të mbyllur . “Numri i të infektuarve që raportohet është shumë më i ulët se numri real i tyre. Numri i fataliteteve, po ashtu më i lartë seç raportohet. Edhe transparenca për COVID është kthyer në funksion të propagandës. Vetëm në spitalin e Matit janë mbyllur disa pavione për shkak të përhapjes së infeksionit . Sistemi shëndetësor po del jashtë funksioni për shkak të shpërthimit të infeksionit në çdo pavion. Ky kolaps i sistemit eshte emergjenca me akute qe kane sot shqiptaret. Çdo përpjekje për të larguar vëmendjen nga kolapsi i sistemit shëndetësor është kriminal Basha i bëri thirrje qeverisë të ndalë rrjedhjen e fondeve dhe t'i orientojë fondet drejt krizës shëndetësore.