Kryetari i Partisë Demokratike, Lulzim Basha gjatë prezantimit të programit për rininë u zotua se do të zgjidhë çështjen e papunësisë për këtë kategori. Ai shtoi se do të angazhohet për të ndihmuar të rinjtë për të ngritur biznese, duke bërë të mundur kalimin tek ata të të aseteve të sekuestruara në bazë të ligjit anti-mafia. Angazhohem që asetet e sekuestruara në bazë të ligjit anti-mafia, do të kalojnë në duart e të rinjve që ngrenë biznese me benefite sociale për shoqërinë. Angazhohem që ta bëj brezin e ri përparësi të qeverisjes sonë! Punë, arsim, mundësi, profesion. Rinia do të jetë e para... Basha tha po ashtu se do të jepen 5000 bursa të plota në vit për të gjithë të rinjtë, të cilët kanë pamundësi ekonomike për të ndjekur studimet e larta. “Angazhohem se të gjithë studentët shqiptarë, 9 në 10 prej tyre që vinë nga familje me të ardhura nën 64.000 lekë të reja në muaj do të përfitojnë mbështetje të plotë përmes financimit 100% të tarifave për bachelor dhe master. Pjesa tjetër, që vinë me të ardhura mbi 64.000 lekë të reja në muaj do të përfitojnë përgjysmimin e këtyre tarifave universitare. Ndërsa 5000 bursa të plota në vit do t’u ofrohen të gjithë të rinjve të cilët kanë pamundësi ekonomike për të ndjekur studimet e larta. Nuk do të ketë te rinj, nuk do të ketë bija dhe bij shqiptarësh që do të mbeten pa studiuar për shkak të pamundësive ekonomike të familjeve të tyre. Angazhohem ndaj studentëve, se do të kenë praktika të paguara prej 30 000 Lekë në muaj për 12 muaj për 10.000 më të mirët prej tyre çdo vit.