Kryetari i Partisë Demokratike Lulzim Basha, gjatë turit të tij të takimeve me qytetarët, premtoi nga Lushnja se kur të vijë në pushtet, çdo vit për sektorin e bujqësisë do të akordohen 150 milionë euro. Pas disa takimeve që zhvilloi me biznese në Lushnjë, kreu I PD-së u shpreh se do të vendosë në dispozicion të bujqësisë, 100 mln euro subvencione në ndihmë të fermerëve dhe 50 mln euro në vit për ndërtimin e infrastrukturës. “Çdo vit, do të kemi 100 milionë euro subvencione drejtpërdrejt tek fermeri dhe 50 milionë euro për infrastrukturën për bujqësinë. Nga pamundësia dhe mbijetesa, fermeri do të kalojë tek mundësia për të krijuar të ardhura mbi 1 milionë lekë, siç është sot fermeri i Kosovës apo Maqedonisë. Fermeri nuk ka pse të jetë skllav si sot, por të jetë shtresë e mesme. Plani ynë fuqizon bujqësinë dhe agrobiznesin me qëllim rritjen e punësimit. Shëron plagën e largimit të rinisë nga Shqipëria. Kjo që propozojmë, është një Shqipëri tjetër, ku nuk përfiton vetem kryeministri me një grusht oligarkësh, por përfitojnë të gjithë.”, u shpreh Basha. Basha ka premtuar se brenda 100 ditëve të para të qeverisjes së tij do t’i jepet fund naftës pa cilësi në tregun shqiptar, si do ti japë fund kontrabandës së karburanteve.