Kryetari i Partisë Demokratike, Lulzim Basha duke kujtuar fitoren e parë të PD në 22 mars 1992 e ka përcaktuar këtë datë si një frymëzim dhe angazhim të ri. Gjatë fjalës së tij, Basha premtoi se do ta clirojë Shqipërinë nga e keqja, duke kërkuar bashkimin nga të gjithë për një mission. Fitorja e parë e zgjedhjeve nga Partia Demokratike, është një ditë domethënëse jo vetëm për ne demokratët, po për të gjithë shqiptarët. Ajo ishte ora e ndarjes përfundimtare me diktaturën dhe fillimi i një procesi të ri, vërtet të gjatë dhe të lodhshëm, por të domosdoshëm për një vend që aspiron të bëhet anëtar i Bashkimit Europian. 22 Marsi, kjo ditë e shpresës, ditë e fitores, kthehet sot në një frymëzim dhe angazhim të ri për ne që të japim gjithçka që kemi për ta bërë Shqipërinë një vend më të mirë. Rrugëtimi ynë nuk ka qenë i lehtë. Ka patur dhe padyshim që do të ketë vështirësi edhe në të ardhmen, por ne demokratët kemi treguar që jemi seriozë dhe këmbëngulës në ato që bëjmë. Gjatë qeverisjes tonë, ne iu mundësuam shqiptarëve lëvizjen e lirë dhe pa viza në Europë. Ne e anëtarësuam Shqipërinë në NATO. Duke kujtuar fitoren e parë, lideri i Partisë Demokratike bëri thirrje për bashkim për ta kthyer 25 Prillin në këtë 29 vjetor të ardhjes të demokracisë së vërtetë në Shqipëri.