Deklaratës së SPAK se ka dërguar zarfin me fletëthirrjen në Kuvend dhe se ky zarf është refuzuar nga grupi parlamentar i Partisë Demokratike i është përgjigjur ashpër kreu i grupit parlamentar demokrat, Gazment Bardhi. Bardhi thotë se një zarf i tillë nuk ka mbërritur tek grupi dhe për pasojë, grupi i PD nuk ka pasur se çfarë të refuzojë. “Referimi nga SPAK i një gënjeshtre të thënë nga Kuvendi i Shqipërisë meriton vetëm përbuzje. Vetë SPAK ishte në dijeni të faktit se nuk ka dërguar ndonjë njoftim drejtuar Grupit tonë Parlamentar dhe për pasojë nuk mund të keqinformojë median mbi fakte të shtrembëruara për interesa politike nga ana e Kuvendit të Shqipërisë”, thotë Bardhi. Sipas Bardhit, ofrimi i shërbimeve postare nuk bën pjesë te roli dhe përgjegjësitë e një grupi parlamentar dhe as te stafet e tyre politike. Bardhi thotë se zarfe nga SPAK nuk ka as te kutitë postare të deputetëve, përfshirë këtu edhe kutinë e kreut të PD-së, Sali Berisha. Bardhi e mbyll reagimin me keqardhje për atë që e cilëson si keqpërdorim politik të Prokurorisë së Posacme, për propagandë dite të inskenuar nga mazhoranca socialiste në Kuvendin e Shqipërisë.