Banka Qendrore ka ndërhyrë në tregun valutor duke blerë tepricat e euros, çka është reflektuar në fuqizimin e monedhës së përbashkët europiane karshi lekut. Euro kaloi 100 lekët këtë të enjte, pas disa ditësh që këmbëhej nën këtë nivel. Sipas kursit zyrtar të këmbimit të Bankës së Shqipërisë, euro u këmbye me 100.19 lekë, duke arritur nivelin më të lartë që prej datës 5 gusht. Në tre ditët e fundit, kursi iu kthye rritjes dhe të premten e kaloi përsëri kufirin e 100 lekëve duke arritur afër niveleve ku ka qëndruar gjatë sezonit verpor. Kjo qëndrueshmëri ka qenë rezultat i pranisë së vazhdueshme në treg të Bankës së Shqipërisë. Prej muajit maj, banka qendrore ndërhyri me blerje direkte në tregun valutor për të mos lejuar një rënie të mëtejshme të kursit. Sipas Bankës së Shqipërisë, një forcim i mëtejshëm i lekut do të ishte në dëm të objektivit të inflacionit.