Zëdhënësi për Punë të Jashtme i Bashkimit Evropian, Peter Stano, deklaroi të martën se Kosova ende nuk e ka dorëzuar një raport të plotë hetimi në lidhje me sulmin e 24 shtatorit, në Banjskë. Diplomati europian thase hetimi për Banjskën duhet të kryehet nga autoritetet e Kosovës. “Nëse po i referoheni incidentit në Banjskë, të 24 shtatorit, kjo është diçka që ka ndodhur në territorin e Kosovës dhe autoritetet kosovare janë përgjegjëse për hetimin dhe ofrimin e një raporti të plotë hetimi.”, tha Stano. Sipas tij, përderisa raporti nuk është dorëzuar, nuk mund të vazhdohet më tej pa rezultatet e hetimit. Lidhur me këtë deklaratë, ka reaguar ambasadori i Kosovës në Belgjikë, Agron Bajrami i cili është shprehur se Kosova ia ka dërguar BE-së disa raporte pas asaj që ndodhi me 24 shtator. Ai thotë se Ambasada e Kosovës në Bruksel zyrtarisht ka informuar BE-në dhe shtetet anëtare për sulmin në Banjskë, nëpërmjet disa dokumenteve.