Policia e Tiranës ka arrestuar tre të rinj, dy prej të cilëve minorenë, të dyshuar si autorë të të paktën katër grabitjeve me dhunë të qytetarëve në kryeqytet. Në pranga ra 19-vjeçari me inicialet E.Sh., dhe dy shokë të tij nga 17 vjeç. Të arrestuarit janë që të gjithë banues në Tiranë. Arrestimi i tyre u bë nga shërbimet e komisariateve 1, 2 dhe 3 në bashkëpunim me forcat Shqiponja. Nga veprimet hetimore të kryera ka rezultuar se këta shtetas, ditët e fundit, iu kanë vjedhur me dhunë, disa shtetasve, shuma të ndryshme parash. Nga hetimet e kryera ka rezultuar se 3 të arrestuarit janë autorë të dyshuar të 4 vjedhjeve të ndodhura që të gjitha pas Vitit të Ri në Tiranë. Gjatë kontrollit të banesës së njërit prej 17-vjeçarëve, shërbimet e Policisë, gjetën doza me lëndë narkotike kanabis, të cilat u sekuestruan cilësinë e provës materiale.