Vepra artistike provokuese e Maurizio Cattelan, që nuk është gjë tjetër vecse një banane e ngjitur me shirit ngjitës në mur, është shitur për 6.2 milionë dollarë në një ankand në shtëpinë e ankandeve Sotheby's në Nju Jork, katër herë më shumë nga vlerësimet e mëparshme. Shtëpia e ankandeve tha se sipërmarrësi kinez i kriptomonedhave, Justin Sun, la pas gjashtë rivalë të tjerë, duke marrë me vete instalacionin e quajtur "Komediani" të artistit italian të mërkurën. “Në ditët në vijim, unë personalisht do ta ha bananen si pjesë e kësaj eksperience unike artistike”, citohet të ketë thënë Sun. Banania e ngjitur në mur - tani ndoshta një nga frutat më të shtrenjta të shitura ndonjëherë - në fakt u ble më herët gjatë ditës në treg për vetëm 0.35 dollarë, sipas Neë York Times. "Komediani" u prezantua për herë të parë për publikun në vitin 2019, duke u bërë menjëherë një sensacion viral dhe duke nxitur gjithashtu debate të nxehta se çfarë është arti. Instalimi - i cili ka udhëtuar nëpër botë - vjen me udhëzime se si të zëvendësohet banania sa herë që kalbet. Në fakt, fruti është ngrënë jo një, por dy herë. Në vitin 2023, një student arti i Koresë së Jugut e hëngri atë kur instalacioni u shfaq në Muzeun e Artit Leeum të Seulit. Muzeu më vonë vendosi një banane të re në të njëjtin vend, raportuan mediat lokale. Katër vjet më parë, një artist tjetër e hoqi bananen nga muri dhe e hëngri pasi vepra u shit për 120,000 dollarë në Art Basel në Miami. Banania u zëvendësua me shpejtësi dhe nuk u ndërmor asnjë veprim tjetër.