Një objekt që dyshohet të jetë një “balonë përgjimi” kineze po fluturon mbi Shtetet e Bashkuara prej disa ditësh dhe zyrtarë të lartë amerikanë kanë këshilluar presidentin Joe Biden që të mos urdhërojë rrëzimin për shkak të shqetësimit se copat e saj mund të përbëjnë një kërcënim për sigurinë. "Është e qartë se qëllimi i kësaj balone është survejimi", u tha gazetarëve të enjten një zyrtar i lartë i mbrojtjes amerikane. Marrëdhëniet mes Kinës dhe Shteteve të Bashkuara, dy ekonomitë më të mëdha në botë, kanë qenë të tensionuara kohët e fundit, me përplasje për shkak të Tajvanit dhe gjendjes së të drejtave të njeriut në Kinë, si edhe aktivitetit të saj ushtarak në Detin e Kinës Jugore. Uashingtoni e ka gjurmuar balonën që kur ajo hyri në hapësirën ajrore të SHBA-së disa ditë më parë, duke e mbikqyrur atë me avionë ushtarakë amerikanë. Zyrtarët nuk pranuan të thonë se në çfarë lartësie po fluturonte balona, por pranuan se po funksiononte mbi trafikun ajror civil dhe nën "pjesën e jashtme të hapësirës".Udhëheqësit e lartë ushtarakë amerikanë shqyrtuan mundësinë e rrëzimit të balonës mbi shtetin e Montanës por përfundimisht rekomanduan mos kryerjen e një lëvizjeje të tillë për shkak të rrezikut të mundshëm të sigurisë nga copëzat e saj. Zyrtarët amerikanë e diskutuan këtë çështje edhe me homologët e tyre kinezë. "Ne u kemi komunikuar atyre seriozitetin me të cilin e trajtojmë këtë çështje," thanë burimet. Balonat përgjuese kanë fluturuar mbi Shtetet e Bashkuara disa herë vitet e fundit, por kjo balonë duket se ka qarkulluar më gjatë se në rastet e mëparshme.