Samiti i trete Digjital i Ballkanit Perëndimor, i organizuar nga Shqipëria ka nisur punimet në ditën e parë , me pjesëmarrës nga qeveritë e Rajonit, Bashkimi Europian si dhe përfaqësues nga agjencitë e sektorit publik dhe sipërmarrës privatë. Përgjatë tre ditëve do të shkëmbehet eksperienca e nderlidhjes dixhitale përmes rrjeteve të besueshme, dixhitalizimi i proceseve të biznesit, të shërbimeve publike si dhe zhvillimin e aftësive dixhitale. Samiti zhvillohet në kuadrin e Procesit të Berlinit për Ballkanin Perëndimor, ndërkohë që për shkak të pandemisë, edicioni këtij viti u organizua online. Në fjalën e saj gjatë samitit, ministrja e Infrastrukturës dhe Energjisë, Belinda Balluku tha se koha në të cilën po kalojmë tregoi qartë se sa i rëndësishëm është konektiviteti dhe shkëmbimi i përvojes dhe ndarjes së mendimeve sa i takon hartimit të iniciativave të përbashkëta. Balluku ndau me të pranishmit nismat që ka ndërmarrë Qeveria Shqiptare në rrugën e transformimit dixhital.“Zhvillimi i infrastrukturës së informacionit dhe teknologjisë është një nga prioritetet e Qeverisë së Shqipërisë dhe pjesë e objektivave strategjikë kombëtar, për zhvillim dhe integrim. Ne kemi miratuar një dokument të ri strategjik për Zhvillimin e Qëndrueshëm të Infrastrukturës Digjitale, me vizionin për të ndërtuar infrastrukturë digjitale me shpejtësi të lartë dhe shumë të lartë, drejt një shoqërie gigabit. Në proces janë gjithashtu, edhe përgatitja e një strategjie të re për biznesin dhe inovacionin dhe strategjia për specializimin inteligjent”, tha Balluku. 67 spikera dhe moderatorë do të mbajnë fjalën e tyre gjatë punimeve të Samitit Digjital, teksa për ta ndjekur atë janë regjistruar më shumë se 600 persona nga vende të ndryshme të botës.