Ministri i Brendshëm Taulant Balla u takua me Prokurorin e Përgjithshëm, Olsian Çela, nga i cili kërkoi mbështetje në goditjen e të fortëve rrjeteve të shpërndarësve të drogës.. Balla dhe Çela për dy orë me radhë diskutuan lidhur me rritjen e bashkëpunimit mes Policisë së Shtetit dhe Prokurorisë me fokus intensifikimin e luftës kundër krimit dhe korrupsionit. Bashkëpunimi i ngushtë u vlerësua nga të dyja palët si parakusht për realizimin e objektivave të përbashkëta. Prokurori i Përgjithshëm dhe Ministri i Brendshëm vunë gjithashtu theksin edhe tek nevoja e rritjes së cilësisë së hetimeve dhe një qasje proaktive në monitorimin dhe procedimin e “të fortëve” në lagje, në sheshe e qendra të banuara në të gjithë vendin, me qëllim goditjen dhe parandalimin e fenomeneve kriminale që prekin nga afër qytetarët. Në takim ishin të pranishëm edhe Drejtori i Përgjithshëm i Policisë së Shtetit Muhamet Rrumbullaku, Drejtuesi i Prokurorisë së Tiranës, Arens Çela dhe Drejtori i Agjencisë së Mbikëqyrjes Policore, Ardi Veliu.