Hetime dhe pista të reja kanë dalë në dritë për vrasjen e Pëllumb Metës në Shënavlash të Durrësit, për të cilin qëndrojnë pas hekurave tre fëmijët e tij. Pas ndryshimit të dëshmisë së Hygerta Metës, që mori përsipër vrasjen e babait, grupi hetimor shprehet i bindur se nuk ka dyshime mbi autorësinë e krimit. Të paktën nga veprimet proceduriale të deritanishme rezulton se vrasësi i dyshuar është Hysen Meta, djali i madh i Pëllumbit. E vetmja gjë ende e paqartë për grupin hetimor mbetet motivi kryesor i krimit. Gjithsesi dhuna në familje, qoftë ajo psikologjike, e shoqëruar me episode dhune fizike të herëpashershme ndaj nënës, sicc dëshmohet vetëm nga Blerina dhe vajza e saj e arrestuar, konsiderohet motiv që ka nxitur urrejtjen ndaj babait duke planifikuar kështu edhe vrasjen e tij. Pesha e përgjegjësisë nga dëshmitë dhe provat e deritanishme bie mbi Hysen Metën dhe motrën e tij Hygerta. Të dy kanë qenë të pranishëm në krim, por roli i nënës së tyre Blerina Metës, konsiderohet shumë i rëndësishëm në këtë ngjarje kriminale.