Shqiptarët e Shqipërisë dhe të Kosovës kryesojnë në listën e aplikuesve nga Ballkani Perëndimor për azil në një vend të Bashkimit Evropian, për tre muajt e parë të vitit 2024. Sipas raportit të Agjencisë së Bashkimit Evropian për Azilin (EUAA) numri i aplikuesve nga Shqipëria dhe Kosova është tejet i lartë krahasuar me vendet tjera fqinje si Maqedonia e Veriut, Serbia, Bosnje Hercegovina dhe Mali i Zi. Nga rreth 2,016 aplikime të shtetasve shqiptarë nga janari në mars të këtij viti, një pjesë e tyre është shqyrtuar, ndërkohë që 2,752 aplikime mbeten ende në pritje. Sipas raportit, interesi më i lartë i shtetasve shqiptarë për aplikime për azil si për vitin e shkuar edhe për tre muajt e parë të këtij viti është në vende si Franca, Italia dhe Gjermania. Përveç Bashkimit Evropian, prirja e shqiptaërve për të kërkuar azil gjatë 2 viteve të fundit eshte edhe Britania e Madhe. Ndërkohë këtë vit numri i shqiptarëve që kanë hyrë në mënyrë të parregullt në Angli përmes kanalit të la Manshit, sipas autoriteteve britanike është në shifra të papërfillshme.