Pasi Vetvendosoja dhe LDK-ja dakordësuan Bekim Sejdiun, ish gjyqtarin e gjykatës kushtetuese, si figurën e tyre konsensuale për presidentin e ri të Kosovës; në mediat lokale u publikua një shkrim me titull: “Paraja dhe Presidenti - Bekim Sejdiu para katër muajsh fitoi tender në Ministrinë e Donika Gërvallës.” Avokatura Shtetërore, agjenci në varësi të Ministrisë së Drejtësisë sqaron opinionin publik se ky shkrim është i pavërtetë. “Pretendimi se Bekim Sejdiu ka “përfituar një tender në Ministrinë e Drejtësisë” është tendencioz dhe paraqet në mënyrë të shtrembëruar natyrën e angazhimit dhe procedurën përmes së cilës është bërë ai. Në rastin konkret, bëhet fjalë për një angazhim profesional në kuadër të dy proceseve të arbitrazhit ndërkombëtar, i propozuar nga firmat ndërkombëtare që mbrojnë interesat e Republikës së Kosovës dhe i realizuar në përputhje me rregullat e prokurimit publik.” – thuhet në reagim.