Një avion ushtarak spanjoll, që transportonte Ministren e Mbrojtjes Margarita Robles drejt Lituanisë pësoi një bllokim të sistemit të orientimit, GPS. Ngjarja raportohet se ka ndodhur paraditen e së mërkurë, teksa avionic po fluturonte në hapësirën ajrore pranë enklavës ruse në Balltik, Kaliningrad. Avioni ishte rrugës për në Lituani për një vizitë zyrtare, tha ministria, duke konfirmuar një raport të mëparshëm nga agjencia e lajmeve “Europa Press”. Kjo është ndërhyrja e dytë në pak javë që i bëhet sistemeve elektronike të avionëve në pajisjet GPS, pas fikjes së sinjalit të avionit të shefes së Komisionit Europian, Ursula von der Leyen, po për fat të mirë pa pasoja të rënda. Me një postim në rrjetin X, ministria konfirmoi se avioni kishte arritur pa probleme në Lituani për vizitën dhe qëllimin për mbrojtjen e kufijve ajrorë të NATO-s nga kërcënimi rus.