Një pilot u detyrua të mbante një avion të mbushur plot me pasagjerë duke ardhur vërdallë një aeroporti pasi kontrollorin e vetëm të trafikut ajror e kishte zënë gjumi gjatë punës. Pasagjerët në fluturimin nga Parisi në Korsikë mbetën duke pritur në ajër pasi kontrollori po dremiste në mes të turnit ndërsa avioni u rrotullua për afro 20 minuta mbi Mesdhe. Autoriteti i aviacionit civil të francës tha se punonjësi i vetëm në tokë në aeroportin e korsikës, po flinte gjumë duke lënë fluturimin e Air Corsica-s të nisur nga aeroporti Orly i parisit, të bllokuar në ajër. Megjithatë, pas gati 20 minutash në ajër, piloti arriti ta ulte avionin në pistë, pasi kontrollori i trafikut ajror u zgjua. Kontrollori kishte qenë duke pritur në fakt avionin, i cili ishte një orë me vonesë, kur e zuri gjumi. Ai ishte i vetmi anëtar i stafit në turn ndaj askush tjetër nuk ishte aty për ta zgjuar. Kjo bëri që ai të mos ndriconte pistën e vetme 2400 metra të gjatë.Pa mundur që të ulej piloti vazhdoi të fluturonte rreth aeroportit ndërsa ekipi i zjarrfikësve nxitoi të kontaktonte me kullën e trafikut ajror. Më në fund dikush kishte mundur të ngjitej në kullë dhe të zgjonte kontrollorin. “Në një karrierë prej disa dekadash nuk më ishte dashur kurrë të përballesha me një situatë të tillë”, tha kapiteni pas uljes në tokë duke sqaruar sidoqoftë se në asnjë moment nuk kishte patur panik në bord. Madje edhe vetë pasagjerët e panë situatën me humor dhe gjetën shkak për të qeshur. Kontrollori ndërkohë ka rezultuar negativ në testin e alkoolit por sidoqoftë një sanksion i mundshëm po shqyrtohet, thanë autoritetet.