Një avion luftarak finlandez F/A-18 Hornet u rrëzua të mërkurën pranë aeroportit të Rovaniemit në veriun arktik të Finlandës, por piloti fatmirësisht shpëtoi pasi u katapultua, thanë forcat e armatosura. Nuk kishte detaje në lidhje me shkakun e aksidentit i cili ndodhi "në zonën e aeroportit të Rovaniemit" rreth orës 11:00 të mëngjesit. "Piloti, i cili shpëtoi duke u katapultuar në kohë, është dërguar në një qendër shëndetësore për ekzaminime të mëtejshme. Nuk ka lëndime në tokë të lidhura me rrëzimin e avionit", tha ushtria finlandeze në një postim në platformën X. Tym i zi mund të shihej duke u ngritur nga vendi i ngjarjes dhe disa automjete emergjence u dërguan në zonë. Dëshmitarët okularë thanë se e panë avionin ushtarak teksa fluturonte në qiell pak para rrëzimit. Sipas tyre ai dukej se po fluturonte jashtëzakonisht shumë ulët mbi zonën rezidenciale Sivasenvara përpara se të përplasej në tokë. "Avioni u ngrit shumë fort dhe u kthye përmbys. Pastaj kaluan disa sekonda dhe pashë një re tymi të zi. Nuk pashë zjarr, vetëm tym të zi të tmerrshëm", tha një dëshmitar. Zyrtarët e aeroportit thanë se nuk prisnin që fluturimet civile të prekeshin nga aksidenti. Policia rrethoi zonën për t'i hapur rrugë operacioneve të shpëtimit. Një hetim ka nisur tashmë mes autoriteteve civile dhe forcave ajrore. Një takim i ministrave nordikë të mbrojtjes po zhvillohej në Rovaniemi të mërkurën. Ministrat duhej të vëzhgonin ushtrimet stërvitore, por kjo u anulua pas aksidentit. Flota e Forcave Ajrore finlandeze e avionëve F/A-18 Hornet u dorëzua nga Boeing mes viteve 1995 dhe 2000 dhe pritet të dalë nga përdorimi deri në vitin 2030, duke u zëvendësuar nga avionët F-35 nga gjigandi rival i hapësirës ajrore amerikane Lockheed Martin.