Një avion i lehtë mjekësor u rrëzua mbi një bllok të vogël banimi pranë kryeqytetit të Kenias, Nairobi, duke vrarë të paktën gjashtë persona dhe duke plagosur rëndë dy të tjerë, tha një zyrtar lokal. Avioni u nis nga aeroporti Ëilson i Nairobit në orën 14:17 sipas orës lokale dhe ishte në rrugë për në Somaliland kur u rrëzua pak pas orës 15:00. "Kemi humbur katër persona, përfshirë pilotin... gjithçka ishte fatale", tha një zyrtar lokal. "Në shtëpinë ku ra avioni po ashtu humbën jetën dy persona”, tha ai duke shtuar se edhe dy të tjerë në tokë ishin plagosur rëndë. Imazhet nga vendngjarja tregonin turma njerëzish të mbledhur, ndërsa ekipet e shpëtimit kërkonin nëpër mbeturinat e shpërndara. "Avioni filloi të digjej ndërsa ishte në ajër", tha një banore, përpara se të përplasej me shpejtësi mbi shtëpitë në tokë. Një banore tjetër tregoi se "avioni kishte kaluar shumë pranë shtëpisë së saj, duke e tundur atë" dhe tha se kur avioni u rrëzua "kishte pjesë trupash të shpërndara kudo".