Dy persona humbën jetën në Argjentinë pasi një avion privat u përplas me një shtëpi pranë aeroportit, në qytetin San Fernando, në provincën e Buenos Airesit, njoftuan autoritetet lokale. "Avioni u përplas me shtëpitë që ishin jashtë territorit të aeroportit, duke rezultuar në vdekjen e dy pilotëve. Fatmirësisht në shtëpi nuk kishte asnjë njeri", u tha gazetarëve Julio César Bono, zëdhënës i forcës së ngarkuar me sigurinë e Aeroportit. Avioni ishte nisur nga një resort ekskluziv pushimesh në Punta del Este në Uruguaj, tha për AFP një zëdhënës i kompanisë që menaxhon aeroportin. Ai tha gjithashtu se avioni kishte qenë në Rio de Zhaneiro përpara se të nisej për në Buenos Aires. Një zëdhënës i Aeroportit tha se avioni nuk kishte qenë në gjendje të frenonte kur u ul në aeroport dhe se incidenti ndodhi në orën 13:18 minuta sipas orës lokale. Ai gjithashtu raportoi se në avion ndodheshin vetëm piloti dhe bashkëpiloti. Nuk raportohet për të lënduar të tjerë.