Një incident ajror u regjistrua të dielën në Aeroportin e Stambollit, ku një avion Boeing 737-800, i ardhur nga Prishtina, doli nga pista pas uljes. Ambasada e Kosovës në Turqi bëri të ditur se fluturimi u ul normalisht, por gjatë lëvizjes në pistë avioni u devijua. Sakaq ambasada konfirmon se të gjithë pasagjerët u evakuuan në mënyrë të sigurt përmes shkallëve të jashtme dhe nuk pati nevojë për përdorimin e rrëshqitësve emergjentë. Bëhet me dije se të gjithë udhëtarët janë larguar nga aeroporti drejt destinacioneve të tyre pa ndonjë problem. Si pasojë e incidentit, disa avionë të tjerë u detyruan të kryejnë lëvizje rrethore, ndërsa autoritetet e aeroportit kanë njoftuar se pista do të mbetet e mbyllur deri në përfundimin e operacionit për largimin e avionit nga zona ku ndodhet. Ambasada e Kosovës në Turqi ka ofruar gjithashtu kontaktet për qytetarët që kanë nevojë për asistencë. Ndërkohë, ekipet në aeroport po vazhdojnë përpjekjet për të garantuar rinisjen e fluturimeve normale.