Imazhe jo shumë të qarta të dy avionëve të rinj ushtarake kinezë, me karakteristika të fshehta u shfaqën në internet të premten, me ekspertët e mbrojtjes që thanë se ishin dizajne qartësisht të avancuara, por nuk kishte detaje të mjaftueshme për të dalë në përfundime. Të dy modelet janë pa bisht, që do të thotë se nuk kanë stabilizues vertikal për të ndihmuar në ruajtjen e kontrollit. Avionë të tillë zakonisht mbahen të qëndrueshëm nga kompjuterë që interpretojnë inputet e kontrollit të pilotit. Më i madhi nga të dy dizajnet ka një formë diamanti, me tre hyrje ajri për motorët e tij, një konfigurim jashtëzakonisht i pazakontë. Më i vogli ka një plan më konvencional, por pa bisht. Të dy kanë mungesë këndesh 90 gradë, me gjasë për të reduktuar zbulimin nga radarët. Ndërsa Kina modernizon ushtrinë e saj, dizajnet "tregojnë gatishmërinë e industrisë së aviacionit të Kinës për të eksperimentuar dhe për të inovuar", thotë Euan Graham, një analist i lartë në Institutin Australian të Politikave Strategjike. "Cilatdo qofshin meritat apo mangësitë, duket se është një dizajn shumë origjinal," tha ai. Ministria e Mbrojtjes e Kinës nuk iu përgjigj menjëherë një kërkese për koment. Departamenti Amerikan i Mbrojtjes tha se ishte "në dijeni të raporteve", por theksoi se nuk kishte komente shtesë përtej asaj që ishte përfshirë në raportin e tij vjetor për ushtrinë kineze këtë muaj. Shtetet e Bashkuara kanë vite që punojnë me programin e tyre të Dominimit Ajror të Gjeneratës së ardhshme, i cili po zhvillon një avion luftarak të gjeneratës së gjashtë, por nuk është e qartë se si do të vijoi kjo përpjekje nën administratën e ardhshme të Presidentit të zgjedhur Donald Trump. Evropa dhe Azia po bashkëpunojnë për një avion të veçantë të gjeneratës së ardhshme nën Programin Global Combat Air, dhe së fundmi njoftuan ndërtimin e një kompanie të përbashkët britaniko-japoneze.