Dhjetëra e mijëra njerëz në Britaninë e Madhe dhe Irlandë kanë mbetur pa energji elektrike të hënën pasi stuhia Isha u përplas mbi to me erëra të forta dhe shira të rrëmbyeshëm duke goditur rëndë udhëtimet. Erë me shpejtësi 159 km në orë u regjistrua në anglinë verilindore ndërsa e gjithë britania e madhe ishte nën alarm për stuhinë e nëntë që nga shtatori. Isha pason stuhinë Henk, e cila u përplas mbi britani më herët këtë muaj, duke shkaktuar përmbytje të mëdha dhe kaos në shërbimet e trenave dhe në qarkullimin në rrugë. Ekspertët thonë se ndryshimet e klimës po bëjnë që dimrat në rajon të jenë më të nxehtë dhe më të lagësht ndërkohë që po rrisin mundësinë e eventeve ekstreme të motit. Në Irlandë, që u godit keq nga Isha, të paktën 235 mijë shtëpi mbetën pa energji elektrike. Dhjetëra e mijëra të tjera ishin pa energji në irlandën e veriut ndërsa mijëra prona mbetën në errësirë në anglinë veriperëndimore dhe në Uells. Pemët e shkulura me rrënjë në skoci mbyllën shumë rrugë kryesore ndërsa mbetjet dhe përmbytjet bënë që të ndaleshin trenat në stacione. Policia tha se një 84 vjecar kishte humbur jetën mbrëmjen e të dielës kur makina e tij u godit nga një pemë e rënë afër kryeqytetit skocez, Edinburg. Dhjetëra fluturime u anuluan apo u vonuan mbrëmjen e të dielës me disa avionë që u devijuan në aeroporte të tjera pasi nuk mund të uleshin në tokë për shkak të erës së fortë. Një avion i RyanAir nga dublini në Manchester u ul në paris ndërsa një tjetër që ishte nisur nga ishujt kanarie për në kryeqytetin irlandez përfundoi në Bordo pas përpjekjeve të pasuksesshme për tu ulur në tokë. Shumë shkolla në skoci u mbyllën të hënën ndërsa paralajmërimet për përmbytje mbeten në fuqi. Zyra meteorologjike në vend tha se stuhia pritet të largohet më vonë gjatë ditës.