Qeveria e Suedisë njoftoi për paketën më të madhe të saj të ndihmës ushtarake që i ka ofruar Ukrainës që kur Rusia nisi pushtimin e paprovokuar të fqinjit të saj. Paketa, e 16-ta që nga nisja e luftës, është në vlerë prej 1.3 miliard dollarësh. Vendi skandinav, i cili u bashkua zyrtarisht me NATO-n në mars, do të dhurojë një sërë furnizimesh ushtarake, duke përfshirë avionë vëzhgimi ASC 890, raketa ajër-ajër me rreze të mesme veprimi Rb 99, municion artilerie etj. "Suedia po e mbështet Ukrainën me paketën e saj të 16-të të ndihmës, më e madhja deri më tani me vlerë 13.3 miliardë korona," u tha gazetarëve zëvendëskryeministrja Ebba Busch. Duke shkruar në X, ish-Tëitter, presidenti ukrainas Volodymyr Zelensky përshëndeti paketën e ndihmës si "kritike për mbrojtjen dhe rezistencën e Ukrainës". Ndihma suedeze "jo vetëm që shpëton jetë ukrainase, por gjithashtu ndihmon për të siguruar paqen dhe sigurinë afatgjatë në Evropë," shkroi ai. Ministri i Mbrojtjes Pal Jonson, shtoi se avioni i vëzhgimit ASC 890 do të ishte veçanërisht i dobishëm për mbrojtjen ajrore të Ukrainës, duke i mundësuar asaj "të identifikojë raketat e lundrimit dhe dronët në ardhje dhe të identifikojë objektivat në tokë dhe në det”. Stokholmi nuk e ka përjashtuar dërgimin e avionëve të tij luftarakë Gripen në Ukrainë, por të martën tha se i ishte kërkuar nga koalicioni i forcave ajrore për Ukrainën që të priste pasi ata i jepnin përparësi futjes së F-16 të prodhuar nga SHBA në forcat ajrore ukrainase. Suedia ka njoftuar ditët e fundit një paketë ndihme prej 650 milionë koronash për të siguruar furnizimin me energji të Ukrainës, një sektor që është shënjestruar nga sulmet ruse, dhe një paketë kornizë ndihme civile dhe ushtarake prej 75 miliardë koronash për tre vjet, nga viti 2024 në 2026, për të mbështetur Kievin "për aq kohë sa të jetë e nevojshme". Premtimet e sjellin ndihmën e përgjithshme të Suedisë për Ukrainën që nga pushtimi i Rusisë në 2022 në më shumë se 100 miliardë korona, ose 4.1 miliardë dollarë, duke e bërë Kievin marrësin më të madh të ndihmave suedeze.