Për të majtët skenari i bllokimit të seancës plenare nuk ishte aspak surprizues. Kryetari i grupit socialist, Taulant Balla u shpreh se revolta në kuvend nuk lidhet me gjë tjetër veçse me pjesëmarrjen e ulët në protestat e Partisë Demokratike. “Po kujtoja sot plot tetë vite më parë në të njëjtën datë më 18 dhjetor 2017, e njëjta pamje në Kuvendin e Shqipërisë. Atë ditë zgjidhej Prokurori i Përgjithshëm, Arta Marku. Sot pas 8 vjetësh në të njëjtën datë bënte betimin Avokati i Popullit, Endri Shabani, një kandidat i propozuar eksluzivisht me firmat e PD, mes tyre udhëheqës të lartë të asaj që ka mbetur nga Partia Demokratike. E njëjta situatë sot pas 8 vjetësh, ripërsëritur. Kanë ndodhur të njëjtat pamje edhe në dhjetor 2018 nëse mbani mend. Shqiptarët e dinë se sa herë që duket qartë që protestat nuk kanë frymë nuk kanë pjesëmarrje, duhet t’i vëmë zjarrin Parlamentit që të na vijnë njerëzit në protestë.”