Ali Mostashari, 78-vjeçari iranian që u raportua i vdekur gjatë aksionit të policisë në kampin e muxhahedinëve ishte një udhëheqës i lartë i grupit dhe akuzuar si ekzekutor i një sërë sulmesh terroriste ndaj republikës islamike në vitet ‘80. Sipas mediave iraniane, emri i vërtetë i Ali Mostasharit është Abduluahab Faraj-Nejad. Të njëjtan burime shkruajnë se ai mbante shumë pozicione të rëndësishme ushtarake në grup, duke përfshirë edhe atë si komandant i lartë në operacionin Mersad, kur muxhahedinët e mbështetur nga Sadam Husein u përpoqën të pushtonin qytetin Kermansah të Iranit në vitin 1988. Të larguarit që i shpëtuan kthetrave të kultit të terrorit thonë se Faraji-Nejad njihej në organizatë si dikush që kishte një rol të rëndësishëm në të paktën 60 vrasje të zyrtarëve iranianë. Mediat iraniane ngrenë dyshime se vdekja e tij mund të jetë e inskenuar për të fajësuar autoritetet shqiptare, ndërsa theksojnë se i gjithë aksioni ka ekspozuar aktivitetet e paligjshme të muxhahedinëve.