142 të dënuar të burgut të Fushë Krujës janë transferuar në institucionin e vuajtjes së dënimit në Durrës dhe Peqin. Drejtoria e Burgjeve sqaroi se transferimet janë bërë për shkak të rikonstruksionit që burgu I fushë Krujës do t’I nënshtrohet. 85 prej Të dënuarve, sipas burgjeve, janë transferuar në burgun e Peqinit dhe 57 të dënuar të tjerë në Durrës. Për realizimin e këtij procesi janë marrë të gjitha masat e nevojshme për ruajtjen dhe shoqërimin e të burgosurve nga forcat operacionale, nën drejtimin e specialistëve përkatës. Gjithashtu, për lëvizjen janë njoftuar Drejtoria Vendore e Policisë Tiranë, Drejtoria Vendore e Policisë Elbasan, si dhe komisariatet përkatëse, në përputhje me itinerarin e përcaktuar. Autokolona me 57 të burgosur ka mbërritur pa probleme në IEVP Durrës, ku nga ana e institucionit janë marrë masat e plota për pritjen, kontrollin dhe sistemimin e tyre, nën drejtimin e drejtuesve të institucionit, thonë Burgjet. Po ashtu, edhe autokolona me 85 të burgosur ka mbërritur pa probleme në IEVP Peqin, ku janë zbatuar të gjitha procedurat standarde për pritjen, kontrollin dhe sistemimin e të burgosurve, nën drejtimin e drejtuesve të institucionit. Sipas drejtorisë së burgjeve, procesi i transferimit është zhvilluar në mënyrë të qetë, të sigurt dhe në përputhje të plotë me aktet ligjore dhe rregulloret në fuqi.