Austria ishte investitori më i madh i huaj në Shqipëri gjatë tremujorit të parë të vitit 2026. Sipas të dhënave të Bankës së Shqipërisë, investimet austriake arritën në 60 milionë euro, gati dyfish më shumë krahasuar me të njëjtën periudhë të vitit të kaluar. Investimet e saj janë të përqendruara kryesisht në sigurime, energji, hoteleri dhe ndërtim, ndërsa rritja e fundit mendohet të jetë ndikuar edhe nga sektori i pasurive të paluajtshme. Stoku i investimeve austriake në vend ka arritur në 992 milionë euro. Në vendin e dytë u rendit Italia me 49 milionë euro investime të reja, 9% më shumë se një vit më parë. Italia mbetet një nga investitorët më të mëdhenj në Shqipëri, me një stok investimesh prej 1.92 miliardë eurosh, të shpërndara kryesisht në sektorin e shërbimeve dhe gjithnjë e më shumë edhe në pasuritë e paluajtshme. Me diferencë të vogël pason Hollanda me 48 milionë euro investime të reja, 2% më pak se një vit më parë. Megjithatë, ajo vazhdon të mbajë vendin e parë për nga stoku total i investimeve në Shqipëri, me 2.83 miliardë euro.