Forca e Mbrojtjes e Australisë do të lejojë edhe rekrutë nga vendet e huaja në radhët e veta, bëri të ditur Ministria e Mbrojtjes e këtij vendi. Australia, prej vitesh, përballet me numër të ulët rekrutimesh.Kjo, sipas zyrtarëve, është pasojë e nivelit të ulët të papunësisë. Shifrat e fundit të Qeverisë vlerësojnë se Forca e Mbrojtjes ka mungesë të rreth 4.400 trupave. Nga korriku, shtetasit e Zelandës së Re që janë banorë të përhershëm të Australisë, mund të aplikojnë për t’iu bashkuar ushtrisë australiane, ndërsa nga viti i ardhshëm këtë do të mund ta bëjnë edhe banorët nga Britania e Madhe dhe vende të tjera, përfshirë SHBA-në dhe Kanadanë. Ministri australian i Mbrojtjes, Richard Marles, tha se këto ndryshime “janë thelbësore përballë sfidave të sigurisë, gjatë dekadës së ardhshme dhe më tej”. Kanbera ka shprehur vazhdimisht shqetësime për, siç është shprehur, veprimet armiqësore të Kinës. Nën aleancën e njohur si “Pesë sy”, Australia, Britania, SHBA-ja, Kanadaja dhe Zelanda e Re punojnë së bashku edhe në shkëmbimin e informacioneve të inteligjencës.