Dy persona janë vrarë dhe gjashtë të tjerë janë plagosur si pasojë e sulmeve me raketa të rusisë, në dy rajonet lindore të ukrainës, Donjeck dhe Harkiv. Zyrtarët ukrainas konfirmuan se sulmet kishin ndodhur gjatë natës dhe në shënjestër kishte qenë një spital në qytetin Selidove dhe një minierë qymyri. “Dy ndërtesa të spitalit u dëmtuan, gjashtë civilë u plagosën. Mund të ketë viktima nën rrënoja, operacionet e kërkimit po vazhdojnë”, theksoi ministri i brendshëm i ukrainës, Igor Klumenko në telegram. Sipas tij një punëtor në minierën e qymyrit humbi jetën gjatë sulmit. “Katër ndërtesa, 19 automjete dhe një linjë energjie u dëmtuan. Tridhjetë e nëntë minatorë mbetën të bllokuar nën tokë dhe u nxorrën në sipërfaqe vetëm pas ndihmës së shpejtë”, tha ministri ukrainas. Një person tjetër u vra si pasojë e sulmeve ruse në Harkiv, tha guvernatori i këtij rajoni, Oleh Synehubov. Rusia ka nën kontroll shumicën e territorit të Donjeckut dhe ka thënë se synimi i saj është të marrë të gjithë rajonin. Forcat ruse i vazhduan sulmet në Ukrainë madje edhe ndërsa Kievin e vizitoi të hënën sekretari i Mbrojtjes i Shteteve të Bashkuara, Lloyd Austin. Austin e bëri këtë vizitë të paparalajmëruar si shenjë mbështetje për Ukrainën, pasi janë rritur shqetësimet se aleatët perëndimorë të Kievit, vecanërisht SHBA, janë “lodhur nga lufta”. “Jam këtu sot për ta dhënë një mesazh të rëndësishëm – Shtetet e Bashkuara do të vazhdojnë të qëndrojnë përkrah Ukrainës në luftën e saj për liri kundër agresionit të Rusisë, tani dhe në të ardhmen”, tha Austin. Kjo ishte vizita e dytë e Austinit në Ukrainë, i cili udhëtoi me tren drejt Kievit nga Polonia.