Gjykata e Tiranës ka dënuar me nga 6 muaj burg dy ish-zyrtarët e Agjencisë së Mbikëqyrjes Policore (AMP), Artjol Saliasin dhe Gëzim Salën, të shpallur fajtorë për veprën penale të “shpërdorimit të detyrës”. Megjithatë, asnjëri prej tyre nuk do të vuajë dënimin në burg, pasi gjykata vendosi pezullimin e ekzekutimit të tij, duke i detyruar të paraqiten pranë Shërbimit të Provës për një periudhë njëvjeçare. Sipas hetimeve, dy ish-zyrtarët mundësuan në mënyrë të paligjshme punësimin në AMP të Muçi Shaljanit, i cili u vra në një atentat mafioz në nëntor 2025 në Rinas, ndërsa udhëtonte me Gilmando Danin, një emër i njohur për drejtësinë. Nga hetimet rezultoi se Shaljani u pranua si agjent vetëm gjashtë ditë pasi paraqiti kërkesën, duke u shkelur procedurat ligjore të rekrutimit. Ai u pagua nga AMP nga 16 shtatori deri më 11 nëntor 2025, pa u paraqitur asnjë ditë në vendin e punës. Më 11 nëntor 2025, pak pasi ishte kthyer nga Spanja së bashku me Gilmando Danin, automjeti me të cilin udhëtonin u qëllua me breshëri kallashnikovi pranë rrethrrotullimit të Rinasit. Dani humbi jetën në vend, ndërsa Shaljani ndërroi jetë më vonë në Spitalin e Traumës. Hetimet për atentatin vijojnë të kryhen nga Prokuroria e Posaçme (SPAK), ndërsa çështja për punësimin e paligjshëm të Shaljanit përfundoi me dënimin e dy ish-zyrtarëve të AMP-së.