Gjykata e Korçës ka caktuar masën e sigurisë “arrest në burg” për Nikolla Agollin dhe David Priftin, dy të arrestuarit për plagosjen e Brian Syzos në Pogradec. Seanca gjyqësore zgjati rreth dy orë, teksa Gjykata e vlerësoi të ligjshëm arrestimin e autorit të dyshuar të plagosjes, Nikolla Agolli, si edhe të bashkëpunëtorit të tij, David Prifti, duke lënë në fuqi masën e arrestit me burg për të dy. Sipas hetimeve, pas plagosjes së 35-vjeçarit, autori dhe tre bashkëpunëtorët u larguan nga vendngjarja. Ata braktisën fillimisht automjetin në Qafë Thanë dhe më pas u shpërndanë. Nikolla Agolli u arrestua pak minuta më vonë në një furgon në Prrenjas, ndërsa më pas në pranga ra edhe David Prifti. Nga hetimet paraprake dyshohet se motivi i sulmit ka qenë vrasja e Brian Syzos, për shkak të konflikteve të vazhdueshme mes palëve.