SPAK ka kërkuar burgim të përjetshëm për Plaurent Dervishajn, i akuzuar si një nga personat e përfshirë në atentatin ndaj ish-prokurorit të Durrësit, Arjan Ndoja, ngjarje e ndodhur në vitin 2019. Pretenca është lexuar në mungesë të të pandehurve nga prokurori i posaçëm Adnan Xholi, teksa për Julian Meçen, organi i akuzës ka kërkuar dënimin me 35 vite burg. Atentati ndaj Arjan Ndojës ndodhi pasditen e 1 nëntorit 2019, pranë mbikalimit të Shkozetit në Durrës. Një automjet tip “Benz”, ku udhëtonin prokurori Ndoja, Landi Muharremi dhe shoferi Andi Maloku, u qëllua me breshëri kallashnikovi nga persona ende të paidentifikuar zyrtarisht në atë kohë. Nga sulmi mbeti i vrarë shoferi Andi Maloku, i cili ndërroi jetë disa ditë më vonë në spital për shkak të plagëve të marra. Ndërsa Arjan Ndoj dhe Landi Muharremi mbetën të plagosur, por arritën t’i mbijetojnë atentatit.