Që prej ditës kur u shënua atentati ndaj Ardian Capjajt e deri më sot, policia ka mbajtur në vëzhgim të gjithë zonën e Krastës, andej prej nga u qëllua me snajper. Një ndërtesë dykatëshe e pabanuar mendohet të ketë qenë streha e ditëve, apo orëve të gjata të përgatitjes së atentatit, vend, në të cilin policia ka kryer veprime proceduriale. Në ndërtesë, burimet thonë se janë gjetur bishta cigaresh, si dhe disa tulla të lëvizura tek të cilat mund të kenë mbetur shenja të gishtave. Fillimisht u mendua se qitja mund të ishte bërë në këtë pikë, por më pas nga hetimet rezultoi se është bërë në një tjetër vendndodhje. Prokuroria mendon se snajperi ka qëlluar pikërisht në këtë pikë, në hyrje të Kodrës së Krastës. Zona është e lartë, ndërsa ka fushëpamje të rrugës, në të cilën mendohet se ka dalë Ardjan Çapja nga vila për në biznesin në pronësi të tij.