Policia e Sarandës ka arrestuar një 21-vjeçar të dyshuar si bashkëpunëtor në atentatin me lëndë plasëse, ngjarje e ndodhur më 5 shkurt 2026 pranë Urës së Vrinës. I riu akuzohet se ka bashkëpunuar me dy persona të tjerë, të shpallur më herët në kërkim, për vendosjen e eksplozivit në automjetin që drejtonte shtetasi M. Gj. Po ashtu, gjatë kontrollit në banesën e 21-vjeçarit në fshatin Shëndëlli, efektivët gjetën dhe sekuestruan një armë zjarri pistoletë me municion luftarak, e cila mbahej pa leje. Sipas Policisë, ndaj të riut është lëshuar urdhër ndalimi për veprat penale “Vrasja me paramendim”, mbetur në tentativë dhe e kryer në bashkëpunim, si dhe “Mbajtja pa leje dhe prodhimi i armëve, armëve shpërthyese dhe municionit”. Ndërkohë, vijojnë kërkimet për kapjen e dy shpallurve në kërkim, të cilët dyshohet se kanë vendosur lëndën plasëse në automjet.