Gjykata e Shkodrës ka caktuar masat e sigurisë detyrim paraqitje, ndalim i daljes jashtë vendit dhe pezullim nga detyra për katër efektivët e policisë së Shkodrës lidhur me atentatin e ndodhur në Dobraç pasditen e 30 tetorit, ku humbën jetën katër persona. 4 punonjësit e policisë, konkretisht inspektorët me iniciale B. K., dhe V.L. me detyrë Patrullë e Përgjithshme, dhe inspektorët J. S, dhe M.M, përkatësisht 31 dhe 33 vjeç me detyrë Trupë Shërbimi u arrestuan dy ditë më parë nga Agjencia e Mbikëqyrjes Policore. Ata akuzohen për veprën penale “Shpërdorim detyre” pasi nuk kanë rrespektuar procedurat standarde të “Sigurimit të vendit të ngjarjes” dhe shoqërimit për identifikim të personave të gjetur në vendin e ngjarjes. Sipas AMP, efektivën në fjalë nuk ndaluan personin e tretë që ndodhej në makinën tip Benz S-Class me dy viktimat, Hamza Lici dhe Arlind Bushati. Në lidhje me vrasjet, Prokuroria e Shkodrës ka shpallur moskompetencë, duke ia kaluar dosjen Prokurorisë së Posçme, për shkak se ka dyshime se ngjarja është kryer nga një grup i strukturuar kriminal. Në atentat, të vdekur mbetën edhe çifti i qytetarëve pa lidhje me ngjarjen, Bashkim Basha dhe Flutura Basha.