Avokati Gjergj Neli, njëherazi i afërm i Kreshnik dhe Gentjana Mujecit, të cilët mbetën të vrarë nga atentati në Balldren të Lezhës, ka reaguar publikisht, duke kërkuar nga autoritetet zbardhjen e plotë të ngjarjes dhe vënien përpara përgjegjësisë të autorëve. Ai dënoi ashpër krimin dhe shprehu solidaritet me familjarët, ndërsa bëri thirrje që hetimet të mos fokusohen vetëm te pista e hakmarrjes. Në reagimin e tij, Neli kundërshtoi pretendimet që e lidhin ngjarjen me konflikte të mëparshme, duke theksuar se këto deklarata janë të pabazuara në fakte. Sipas tij, Kreshnik Mujeci nuk është shpallur fajtor për një çështje të vitit 2017, e cila është trajtuar dhe mbyllur nga organet e drejtësisë, duke iu referuar vrasjes së Gent Pjetri, në tetor 2016 dhe pistës së hakmarrjes. Ngjarja e rëndë ndodhi një ditë më parë në fshatin Balldre të Lezhës, ku Kreshnik dhe Gentjana Mujeci, prindër të katër fëmijëve, u vranë në një atentat. Autoritetet vijojnë hetimet për zbardhjen e plotë të rrethanave dhe identifikimin e autorëve.