Policia e Shkodrës thotë se ka zbardhur atentatin e dështuar me armë zjarri të ndodhur në lagjen Xhabije në orët e mbrëmjes së të enjtes. Sipas deklaratës së uniformave blu, për atentatin ndaj Selami Brahimit, që mbeti i plagosur është arrestuar në Berlin të Gjermanisë 68 vjeçari Selami Kapllani, banor i lagjes Guerile në Shkodër. Ndaj shtetasit Kapllanit, Prokuroria kishte lëshuar një urdhër ndalimi për veprat penale “Vrasja me paramendim”, mbetur në tentativë dhe “Mbajtja pa leje dhe prodhimi i armëve shpërthyese dhe municionit”. Policia ka sekuestruar në cilësinë e provës materiale, armën me të cilën është ekzekutuar vepra penale, një AK-47, së bashku me krehra me fishekë, si dhe automjeti i përdorur për transportimin e autorit. Në lidhje me motivet e atentatit policia nuk jep asnjë detaj. Por, burime të Top Neës pohojnë se shkak mund të jetë përplasja mes bandave rivale të Shkodrës. Shënjestra, sipas burimeve, njihet si i afërm i Sokol Liçit dhe dyshohet se pikërisht ky afrimitet mund të jetë bërë shkak për atentatin ndaj tij. Siç rezulton edhe nga përgjimet e SKY të dala në kuadër të dosjes Metamorfoza, grupet kriminale në Shkodër, në pamundësi për të arritur te rivalët kryesorë të tyre godasin njerëzit që i rrethojnë, apo që konsiderohen pjesë e grupit rival.