Presidenti i Ukrainas, Volodymyr Zelensky, i ka mbijetuar një sulmi ajror rus, ndërsa po zhvillonte një vizitë në portin e Odesës në Detin e Zi, bashkë me kryeministrin grek, Qiriako Micotaqis. Sulmi ndodhi shumë pranë autokolonës së tyre të makinave. Të dy ata ndodheshin vetëm 500 deri në 800 metra larg nga vendi i sulmit, ku mbetën të vrarë sipas një zyrtari ukrainas, pesë persona. "A e shihni se me kë kemi të bëjmë? Nuk ka rëndësi se ku keni goditur. Unë e di që ka pasur viktima sot, nuk di detajetë tjera, por di që ka pasur viktima dhe të plagosur”, tha Zelenski. Kryeministri grek, qiriako Micotaqis, tha në anën tjetër se kishte dëgjuar sirenat dhe më pas një shpërthim të madh ndërsa po shkonin drejt makinave. "Ne dëgjuam sirenat dhe shpërthimin shumë pranë nesh. Nuk kishim kohë të shkonim në një strehim të sigurt dhe kjo ishte një përvojë shumë shokuese. Ne pamë se kjo luftë, i prek të gjithë”, tha Micotaqis.