Peniani është tronditur nga një sulm me bombë, thonë burime nga koreja e veriut ndërkohë që Kim Jong un ka shtuar masat e sigurisë me një mori truprojash që e rrethojnë atë. Shpërthimi në kryeqytetin e koresë së veriut u raportua nga një e përditshme në korenë e jugut, e cila citon dëshmi të banorëve lokalë. Burimet thanë se ngjarja ka ndodhur dy muajt e shkuar dhe se ata nuk mund ta përjashtojnë mundësinë që në shënjestër kanë qenë figura të larta të regjimit. Edhe pse shpërthimi mund të ketë qenë aksidental, ose pjesë e një grabitjeje apo një akti tjetër, raporti nënvizon se Kim Jong un është shqetësuar për sigurinë e tij. Në raport thuhet se ai ka importuar pajisje të reja të detektimit të lëndëve shpërthyese dhe ka shtuar truprojat të pajisur me valixhe në ekipin e tij të sigurisë. Sipas një eksperti sigurie, valixhet janë mbrojtje ndaj një tentative për atentat dhe bëhet fjalë për valixhe balistike. Ato janë të bëra me fibra karboni. Përvecse janë të blinduara, ato mbrojnë edhe kundër mjeteve të tjera elektronike.Agjencia e spiunazhit e koresë së jugut nuk ka mundur të konfirmojë shpërthimin. Një zëdhënës tha se nuk është identifikuar një shpërthim bombe por se po hetohen situata të ndryshme. Nuk dihet as nëse ka të lënduar në shpërthim, por mediat koreano jugore sugjerojnë se ka patur të tillë. Ato spekulojnë se një sulm me bombë mund të jetë motivuar nga zemërimi në vend për shkak të krizës së ushqimit dhe kërcënimin me vdekje nga uria.