Atë që nuk e arritën dot dy nga figurat më të larta të Partisë Demokratike, Edi Paloka dhe Gazment Bardhi me dialog, duket se e ka arritur Xhelal Mziu, nëpërmjet një ftese publike drejtuar të gjithë kolegëve të tij, për një drekë festive. Kësaj ftese i janë përgjigjur pozitivisht pjesa më e madhe e deputetëve, teksa surprizë është prania e ish-kryeministrit Sali Berisha por edhe e deputetëve kritikë të tij, si Gazment Bardhi e Jorida Tabaku. Kjo e fundit pjesëmarrjen e saj e ka bërë publike nëpërmjet një postimi në rrjetet sociale, ku shkruan: “NJë dolli për mendimin ndryshe; se të duash të ndryshosh për mirë nuk të bën as të shitur e as të blerë e as peng!”. Bashkëngjitur me këtë shkrim, Tabaku ka postuar edhe disa foto nga dreka festive e organizuar nga Xhelal Mziu, ku duket edhe vetë ish-kryeministri, por bie në sy mungesa e Enkelejt Alibeajt apo vetë Lulzim Bashës.