Kryeministri i ri i përkohshëm i Sirisë, Mohammed al-Bashir, tha se ai synonte të kthente miliona refugjatë sirianë, të mbronte të gjithë qytetarët dhe të ofronte shërbime bazë, por pranoi se do të ishte e vështirë sepse vendit i mungonte valuta e huaj. "Në arka ka vetëm paund sirianë me pak ose aspak vlerë. Një dollar amerikan vlen 35,000 nga monedhat tona," i tha ai gazetës italiane Il Corriere della Sera. "Ne nuk kemi valutë të huaj dhe për kreditë dhe obligacionet ende jemi duke mbledhur të dhëna. Pra, po, financiarisht jemi shumë keq". Ai drejtoi Qeverinë e Shpëtimit të udhëhequr nga rebelët në një xhep të vogël të Sirisë veriperëndimore, përpara se ofensiva rrufe 12-ditore e rebelëve të mbërrinte në Damask dhe të rrëzonte presidentin Bashar al-Assad. Zyrtarët amerikanë, duke u angazhuar me rebelët e udhëhequr nga Hayat Tahrir al-Sham (HTS), u kërkuan atyre që të mos marrin udhëheqjen automatike të vendit, por në vend të kësaj të drejtojnë një proces gjithëpërfshirës për të formuar një qeveri kalimtare. Qeveria e re duhet "të mbajë zotimet e qarta për të respektuar plotësisht të drejtat e pakicave, të lehtësojë rrjedhën e ndihmës humanitare për të gjithë njerëzit në nevojë, të parandalojë përdorimin e Sirisë si bazë për terrorizmin ose të paraqesë kërcënim për fqinjët e saj", tha Sekretari i Shtetit Antony Blinken në një deklaratë. HTS është një ish degë e Al Kaedës që udhëhoqi revoltën kundër Asadit dhe së fundmi ka minimizuar rrënjët e saj xhihadiste. Në një fjalim të shkurtër në televizionin shtetëror të martën, Bashir tha se do të drejtojë autoritetin e përkohshëm deri më 1 mars. Pas tij ishin dy flamuj - flamuri jeshil, bardh e zi i kundërshtarëve të Asadit, dhe një flamur i bardhë me betimin islamik të besimit me shkronja të zeza, i valëvitur zakonisht në Siri nga luftëtarët islamikë sunitë.