Janë shuar shtatë vatra zjarri në vendin tonë brenda 24 orëve të fundit. Këtë e ka bërë të ditur ministri i Mbrojtjes Niko Peleshi përmes një postimi në rrjetet sociale. Ai tha se të shtata vatrat e zjarrit që ditën e djeshme përfshinë zona të ndryshme të vendit janë shuar dhe pavarësisht temperaturave të larta aktualisht nuk ka asnjë vatër aktive në vend. Sipas tij të gjitha vatrat që ishin aktive në fshatin Krastë, në bashkinë e Krujës, janë shuar. Ministri shkruan se puna intensive dhe angazhimi maksimal bëri të mundur shuarjen përfundimtare të flakëve edhe në vendgrumbullimin e mbetjeve urbane, në Elbasan. Lidhur me këtë të fundit, ministri Peleshi theksoi se pas angazhimit maksimal, zjarri u shua plotësisht duke theksuar se situata po monitorohet nga forcat zjarrfikëse të bashkisë së këtij qyteti. Më tej Peleshi thekson se të gjithë strukturat e mbrojtjes civile në nivel vendor dhe qendror mbeten në gatishmëri të plotë.