Nuk ka më "shenja jete" nën rrënojat e një shkolle indoneziane të shembur ku 59 persona rezultojnë të zhdukur, thanë skuadrat e shpëtimit. Qindra nxënës, shumica prej tyre djem adoleshentë, ndodheshin brenda shkollës islamike me konvikt në qytetin Sidoarjo kur ajo u shemb të hënën. Të paktën pesë nxënës u vranë dhe rreth 100 u plagosën, thanë zyrtarët. Trembëdhjetë persona janë nxjerrë nga rrënojat që kur filluan përpjekjet e shpëtimit, megjithëse dy vdiqën më vonë në spital. Operacionet e shpëtimit ishin sfiduese për shkak të strukturës së paqëndrueshme të ndërtesës. Të enjten, agjencia për zbutjen e fatkeqësive tha se shpëtimtarët që përdornin dronë termikë nuk arritën të zbulonin më shenja jete nga rrënojat. "Ne pastruam zonën për të siguruar qetësi. Shpresonim që me përdorimin e pajisjeve të sofistikuara të mund të dëgjonim disa shenja jete," thanë zyrtarët, "por shkencërisht, nuk u gjetëm asnjë". Tani është vendosur që të kalohet në fazën tjetër të operacioneve duke përdorur pajisjet e rënda për lëvizjen e masave të betonit. Ekipet e shpëtimit nuk mundën ta bënin këtë më parë për shkak të frikës se mund të shkaktohej shembje e mëtejshme duke rrezikuar jetën e ndonjë të mbijetuari të mundur. Autoritetet thanë të mërkurën se ende dëgjoheshin të qara dhe britma nga poshtë rrënojave. Familje të shqetësuara prisnin rreth shkollës, në lotë, por me shpresën se të dashurit e tyre mund të nxirreshin gjallë.