Sekretari amerikan i Shtetit Antony Blinken dhe ministri i jashtëm kinez Qin Gang zhvilluan bisedime "të sinqerta" dhe "të drejtpërdrejta" në Pekin të dielën, tha Departamenti i Shtetit, ndërsa Shtetet e Bashkuara dhe Kina kërkojnë të stabilizojnë marrëdhëniet dypalëshe mes tensioneve në rritje. Gjatë takimit shtatë orë e gjysmë në një vilë qeveritare në Pekin, ministri i jashtëm kinez pranoi ftesën për të vizituar Shtetet e Bashkuara. Po ashtu u ra dakord për më shumë vizita të përfaqësuesve të dy vendeve. Përveç kësaj, të dyja palët do të vazhdojnë të punojnë për disa çështje "në nivel grupi pune", tha një zyrtar i lartë i Departamentit të Shtetit. Pas takimeve kokë më kokë të Blinken me homologun e tij, ata patën edhe një darkë pune. “Sekretari e bëri të qartë se Shtetet e Bashkuara gjithmonë do të mbrojnë interesat dhe vlerat e popullit amerikan dhe do të punojnë me aleatët dhe partnerët për të çuar përpara vizionin tonë për një botë që është e lirë, e hapur dhe që mbështet zbatimin e rregullave të pranuara ndërkombëtarisht”, tha zëdhënësi i Departamentit të Shtetit, Mattheë Miller në një deklaratë.