Kaosi në ushtrinë ruse po bëhet një problem në rritje për Vladimir Putinin. Komandantët rusë nuk i binden shefit të Shtabit të Përgjithshëm të Ushtrisë Ruse Valery Gerasimov dhe ushtarët kërcënojnë të lënë postet e tyre në Ukrainë nëse eprorët e tyre arrestohen për shprehjen e mendimeve të tyre. Gjithçka duket se u nxit nga Yevgeny Prigozhin, i cili vendosi të shprehë pakënaqësinë e tij ndaj udhëheqjes ushtarake me një rebelim të armatosur. Megjithëse ai dështoi në planin e tij, Prigozhin krijoi një “efekt domino” në ushtri. Disa oficerë të lartë që atëherë kanë kritikuar hapur strategjinë e luftës së Kremlinit. Moska u përpoq të reagonte shpejt dhe largoi rebelët, por problemi kishte marrë tashmë përmasa serioze. Komandanti më i lartë i larguar nga posti është gjenerali Ivan Popov, i cili kritikoi trajtimin e trupave në vijën e frontit në Zaporizhia dhe mungesën e mbështetjes së artilerisë. Midis drejtuesve të shkarkuar janë komandanti i divizionit 106 të Gardës Ajrore, gjenerali Vladimir Seliverstov, komandanti i Divizionit të 7-të të Gardës Ajrore, Gjenerali Aleksander Kornev dhe komandanti i Divizionit të 90-të të Tankeve, gjenerali Ramil Ibatullin. Precedenti për mosbindjen u krijua nga gjenerali Mihail Teplinski, i cili dha dorëheqjen në janar pas një debati me Gerasimov për forcat ruse gjatë ofensivës dimërore, të cilat pësuan humbje të mëdha. Ndërkohë, ekspertët amerikanë argumentojnë se mosbindja është krijuar në fakt nga vetë Putin, i cili ka anashkaluar rregullisht zinxhirin e komandës në përpjekje për rezultate të shpejta në fushëbetejë, duke degraduar autoritetin e gerasimov dhe ministrit të mbrojtjes, shoigu.