Vënia nën hetim në Kinë, e gjeneralit më të lartë të saj, po e con spastrimin shumëvjeçar të korrupsionit, të shpallur nga Presidenti Xi Jinping, edhe në rrethin e tij më të ngushtë, duke nënvizuar se edhe lidhjet e ngushta personale nuk ofrojnë mbrojtje kur bëhet fjalë për besnikërinë ndaj udhëheqjes së partisë. Ekspertët e Kinës thanë se lëvizja e Xi Jinping kundër aleatit të tij afatgjatë dhe anëtarit të Byrosë Politike, gjeneralit Zhang Youxia, gjithashtu përqendron edhe më shumë pushtet në duart e presidentit, e bën komandën tashmë sekrete të ushtrisë së Kinës më të errët dhe sugjeron se një sulm i afërt ndaj Tajvanit është më pak i mundshëm. "Largimi i Zhang do të thotë që me të vërtetë askush në udhëheqjen kineze nuk është i sigurt tani", thonë ekspertët që e kanë konsideruar hetimin "të habitshëm". Sipas tyre, hetimi shënon një ndryshim të thellë në politikën kineze. Ndryshimi është i jashtëzakonshëm pasi spastrimet në të kaluarën kanë patur në shënjestër njerëz që mund të kenë pasur njëfarë mbivendosjeje me Xi Jinping, por që nuk kishin lidhje të forta personale.