Kryeministri në detyrë i Kosovës, Albin Kurti, ka prezantuar raportin vjetor të inspektimeve për vitin 2025, duke njoftuar se qeveria synon modernizimin e plotë të sistemit të inspektimit. Sipas Kurtit, modeli i ri do të bazohet në nivelin e rrezikut që paraqesin bizneset. Subjektet me aktivitet më të rrezikshëm do të kontrollohen më shpesh, ndërsa ata që përsërisin shkeljet do të përballen me masa më të rrepta, përfshirë gjoba dhe kallëzime penale. Edhe Banka Botërore vlerësoi reformën, duke theksuar se inspektimet e kryera si duhet krijojnë një mjedis më të sigurt dhe më të favorshëm për investime, ndërsa burokracia e panevojshme pengon zhvillimin ekonomik. Sipas disa organizatave monitoruese, gjatë vitit 2025 është rritur numri i inspektimeve në Kosovë, por kjo nuk është shoqëruar gjithmonë me përmirësim të zbatimit të ligjit, pasi sanksionet shpesh nuk kanë qenë mjaftueshëm parandaluese.