Shërbimet e Policisë së Shkodrës kanë finalizuar një tjetër fazë të operacionit antikanabis të koduar “Koordinata”, në kuadër të të cilit janë zbuluar dhe asgjësuar 4002 bimë të dyshuara narkotike të llojit kanabis sativa. Kontrollet janë zhvilluar në territorin e njësive administrative Pult, Ana e Malit, Shosh dhe Shalë, ku forcat e Komisariatit të Policisë Shkodër, në bashkëpunim me Njësinë e Sigurisë Publike, kanë vijuar inspektimet në terren për parandalimin dhe goditjen e rasteve të kultivimit të bimëve narkotike. Në vijim të veprimeve procedurale, janë proceduar penalisht në gjendje të lirë pesë kryetarë fshatrash, të cilët dyshohet se kanë shpërdoruar detyrën në lidhje me kontrollin e territorit që mbulojnë. Operacioni “Koordinata” vijon me intensitet në të gjithë territorin e qarkut Shkodër, me qëllim parandalimin e kultivimit të lëndëve narkotike dhe forcimin e rendit publik.