Vendet e G7-ës po shtojnë përpjekjet për të konfiskuar asetet e ngrira të Bankës Qëndrore Ruse, për t’i kaluar ato në favor të Ukrainës dhe rindërtimit të saj. “Financial Times raporton se vendimi mund të merret në muajt e ardhshëm, teksa udhëheqësit e G7-ës pritet të diskutojnë këtë çështjhe në shkurt të 2024-ës, në prag të dy vjetorit të pushtimit rus në Ukrainë. Kjo vjen pasi mbështetja financiare për Ukrainën ka ngecur në Uashington dhe Bruksel për shkak të mosmarrëveshjeve të brendshme. Pasuritë e sekuestruara mund të derdhen në luftën e Ukrainës dhe përpjekjet për rindërtim, duke ndihmuar vendin që përballet me presion në rritje në fushën e betejës. Asetet e Bankës Qendrore Ruse në Perëndim, u ngrinë pak pasi pasi Rusia nisi pushtimin e saj në shkallë të gjerë të Ukrainës, në shkurt të 2022-shit. Plani për të konfiskuar rezervat e ngrira prej 300 miliardë dollarësh që i përkasin bankës qendrore ruse ka një mbështetje të gjerë nga Kievi dhe Brukseli, por është bllokuar nga ngërçet ligjore. Megjithatë, Uashingtoni ka intensifikuar diskutimet për gjetjen e një rruge ligjore me G7-ën në javët e fundit. Më 28 nëntor, senatorët amerikanë prezantuan gjithashtu një projekt-ligj dypartiak që synon konfiskimin e aseteve të oligarkëve rusë në SHBA, për t’u përdorur për rindërtimin e Ukrainës.